У Мінпрацы нагадалі беларусам пра адну з магчымасцяў павялічыць сваю пенсію — адмовіцца на пэўны час ад гэтых выплат, каб у будучыні атрымліваць больш. Раней Фонд сацыяльнай абароны насельніцтва прасоўваў гэты варыянт павелічэння даходаў.
Памеры пенсіі ў кожнага пенсіянера розныя і залежаць ад працягласці стажу і заробку да выхаду на заслужаны адпачынак, адзначыла начальнік галоўнага ўпраўлення пенсійнага забеспячэння Мінпрацы Алена Гомарава. Чым даўжэй чалавек працуе і з чым вышэйшай зарплаты выплачвае страхавыя ўзносы, тым большы памер пенсіі. Разам з тым кожны чалавек можа паўплываць на свой даход у старасці, адзначыла прадстаўніца ведамства.
«Першая праграма, якая дзейнічае ў нас даўно, — гэта адкладзеная пенсія. Чалавек (пры дасягненні пенсійнага ўзросту. — Заўв. рэд.) прызначае пенсію, але, працягваючы працаваць, можа адмовіцца ад яе атрымання. Адпаведна, калі ён ужо не зможа працаваць, да яго будзе ўжытая так званая бонусная праграма», — расказала Алена Гамарава.
Паводле яе, прыбаўка залежыць ад таго, на які перыяд чалавек адмовіцца ад пенсіі. Мінімальны тэрмін — два месяцы. Максімальны перыяд не акрэслены, ён можа складаць і 10, і 15 гадоў.
«Бонусная праграма прадугледжвае, што пры адмове ад атрымання пенсіі на два месяцы бонусам налічваецца яшчэ 1%. «Калі ты ў выніку адмаўляешся на год — 6%, на два гады — плюс 8%, на тры гады — плюс 10%, на чатыры гады — плюс 12%, на пяць гадоў і больш — па 14%», — патлумачыла Алена Гомарава.
Прадстаўніца Мінпрацы ўдакладніла, што за пяць гадоў адмовы ад атрымання пенсіі ў выніку можна павялічыць памер сваёй выплаты практычна ў два разы.
Раней у Мінпрацы паведамлялі, што скарыстацца такой магчымасцю могуць тыя, хто дасягнуў пенсійнага ўзросту (мужчыны — 63 гады, жанчыны — 58 гадоў) і каму прызначылі пенсію па ўзросце на агульных падставах.
Нагадаем, сярэдняя працягласць жыцця ў Беларусі ў 2023 годзе склала 74,6 года, паведаміла раней дэпутатка парламента, экс-міністр працы Ірына Касцевіч. Пры гэтым сярод жанчын гэты паказчык вышэйшы, чым сярод мужчын — 78 і 64 гады адпаведна (канкрэтна гэта звесткі за 2019 год).
Чытайце таксама
