ЗША часова спыняюць усе пастаўкі ваеннай дапамогі Украіне, пакуль прэзідэнт Дональд Трамп не атрымае гарантый, што ўкраінскія ўлады «дэманструюць гатоўнасць да мірных перамоваў».
Як паведамляе Bloomberg са спасылкай на высокапастаўленага прадстаўніка Міністэрства абароны ЗША, які захацеў застацца ананімным з прычыны абмеркавання канфідэнцыйных пытанняў, прыпыненне датычыць усяго амерыканскага вайсковага абсталявання, якое яшчэ не знаходзіцца на тэрыторыі Украіны, уключаючы тэхніку, якая рыхтуецца да адпраўкі, зброю, якая перавозіцца самалётамі і караблямі, а таксама чакае ў транзітных зонах у Польшчы.
Рашэнне прыняў асабіста Дональд Трамп, даручыўшы выкананне загаду новаму міністру абароны Піту Хегсэту.
Пазней Белы дом афіцыйна пацвердзіў замарожванне дапамогі, паведамляе CNN.
«Прэзідэнт выразна даў зразумець, што яго галоўная мэта — мір. Мы хочам, каб нашыя партнёры таксама былі прыхільныя гэтай ідэі. Таму мы часова прыпыняем дапамогу, каб пераканацца, што яна спрыяе ўрэгуляванню канфлікту, а не яго зацягванню», — заявіў прадстаўнік адміністрацыі Трампа.
Скандал замест угоды
Нагадаем, Уладзімір Зяленскі і Дональд Трамп сустрэліся ў Белым доме ў Вашынгтоне 28 лютага. Меркавалася, што два лідары падпішуць амерыканска-ўкраінскую ўгоду пра карысныя выкапні. Аднак сустрэча прайшла на павышаных тонах. Яна пачалася з таго, што Трамп пракаментаваў выгляд Зяленскага, а адзін з журналістаў выставіў яму прэтэнзію, што той не ў касцюме. Потым падчас размовы віцэ-прэзідэнт ЗША Джэй Дзі Вэнс раптам абвінаваціў Зяленскага ў няўдзячнасці. Той паспрабаваў запярэчыць, дайшло да сваркі, у якую ўключыўся і Трамп. У выніку гутарка была перапыненая, а потым украінскую дэлегацыю папрасілі пакінуць Белы дом датэрмінова. Пагадненне не падпісалі. Паводле інфармацыі The Washington Post, пасля гэтага адміністрацыя Трампа пачала разглядаць прыпыненне ваеннай дапамогі Украіне.
Пазней дзяржсакратар ЗША Марка Рубіа ахарактарызаваў сустрэчу як «фіяска», выказаў сумнеў у тым, ці сапраўды ўкраінскі лідар хоча міру ў сваёй краіне, і заявіў, што Зяленскі мусіць папрасіць прабачэння. Зяленскі ж сказаў, што яму прасіць прабачэння няма за што.
«Калі, напрыклад, кажуць, што Украіна амаль разбураная, што нашыя салдаты бягуць, што яны не героі, што Украіна страціла мільёны цывільных, што яе прэзідэнт — дыктатар. Якая мусіць быць рэакцыя? Рэч не ўва мне», — заявіў прэзідэнт Украіны, але падкрэсліў, што спадзяецца на нармалізацыю адносін з Белым домам.
Пасля скандальных перамоваў паміж Зяленскім і Трампам у Лондане 1−2 сакавіка прайшоў саміт па пытаннях абароны і бяспекі Еўропы. Як вынікае з дамоўленасцяў, Украіне дадуць сродкі для закупкі тысяч ракет супрацьпаветранай абароны, а шэраг краін NATO даў зразумець пра свае планы павялічыць вайсковыя выдаткі.